شوفي لنا بنت حلال- ماحدش يفهم غلط

بدون اي مقدمات او اعتذارات عن الغياب وعدم الكتابة اعود
مازلت كما انا لا يوجد لفكرة الزواج مكان في حياتي الا بعض النزوات الحمقاء التي لا تستمر الا ايام قليلة اعود بعدها لتضربني هراوة الواقع ضربة تعيدني الى صوابي واتزاني
المهم سيبنا من الكلام المكلكع والرغي الكتير

وانا بسنكح على النت كالعادة لقيت القصيدة دي لعمنا بيرم التونسي
بيرم بيحكي عن واحد معلم كان بيدور على عروسة وبيكلم الخاطبة في القصيدة عشان يعرفها مواصافاته اللي عايزها في شريكة حياته لكن ايه معلم دماغ

- الخاطبة لمن لا يعرف هي مهنة انقرضت ظاهرا ولكن موجودة الى الآن في صورة صديق رخم يعرض عليك عروسة أو قريب تلم يصر على التوسط لك في زواجة سقع و هكذا من الخاطبات المتنكرات في زي اصدقائك واقاربك
المهم اسيبكو مع القصيدة:

شوفي لنا بنت حلال



جدع معلم قال لخالتك ام هلال
شوفي لنا بنت حلال تكون لطيفة و عال

بنات كتير حلوين عند اهلهم قاعدين
ما بين طبيخ و عجين و بختهم بطال

عايزها لحم فصوص مش عود قصب ممصوص
و محربقه بعصعوص و عامله روحها غزال

عايز قوام يتهز إن دزيتيه يندز
و ف كل مفصل حز يفكرك بهلال

عايز نتايه صحيح من ربع شمع تسيح
مهوش بشكل قبيح لكن بذوق و دلال

عندك بنات جمالات مقلوظين نتايات
و دمهم شربات يسكر نسا و رجال

تحققي في الزين البنت ترخي العين
دي مهرها ألفين أحطهم في الحال

أما اللي عاملة سبور و جدها بلفور
و عايزه واد دكتور خسارة فيها ريال

و لا اللي عاملة إله و شعرها قصاه
و بأكسجين صابغاه دي تجلب الإسهال

و ان جبتي واحده بكرش من الحمير ما تغيرش
مانيش واخدها بقرش و احط فوقها شوال

قال ايه : احصـــــاء

من كام يوم كده قال ايه خير اللهم اجعله خير الجهاز المركزي للتعبئة العامة والإحصاء

( للي ما يعرفش ايه الجهاز ده هو الهيئة المسؤولة عن عد البني آدمين في مصر والحمدلله عددنا وصل في أول مايو 2008 إلي 78 مليونا و733 ألفا و641 رأس، بينهم 3 ملايين و901 ألف و396 بني ادم بالخارج، والباقي اللي هما 74 مليونا و832 ألفا و245 رأس لسه بيحاولو يخروجوا ويطفشوا علشان البلد تفضى لحبايبنا وزي ما قال عادل امام ومايبقاش في شعب بقى والرويسا مايلاقوش حد يكفروه ويطلعه عين امه و يروحو شايفين عقد عمل ويروحو السعودية

المهم الجهاز ده بيقولك ايه معلومة خطيرة - انتصار لكل المجانين اعداء الزواج امثالي - حيث قفز عدد السكان اللي لم يسبق لهم الزواج إلي 13.3مليون نسمة، بنسبة 28.8% من السكان.يعني والحمد لله ربع الشعب المصري حر

على الأقل في بيته صحيح مش مهم تكون حر في الشارع ولا في الشغل ولا في المدرسة ولا الجامعة ولا في الانتخابات خصوصا الانتخابات

ولا الصحافة بالذات الصحافة والا يبقى تطاول على الذات الالهية استغفر الله العظيم قصدي الذات الرئاسية ويتحكم عليك بالحبس مع انه اصلا في قانون ان الصحفي ما يتحبسش طيب ازاي عاوز افهم

ولا تتعب نفسك هز ديلك وكل عيش وخلاص ده طبعا لوعرفت تجيب عيش وتخرج سليم من غير ما تستشهد او عل الاقل تطير ليك عين ولا رجل

وبعدين اصلا اصلا دي ما اسمهاش حرية دي بعد الشر بعد الشر بيقولو عليها في بلاد الفرنجة ديموقراطية وده مرض خطير جدا جدا في الدول العربية القومية البطيخية

الحرية الحقيقية ودي اهم حاجة انك تكون حر في بيتك

اسد في مملكتك لا حد يقولك انت رايح فين وجاي منين ولا حد يقلبك اول كل شهر وتفضل تشحت مصروفك و كل ماتيجي تخرج تدي تقرير تحركات زي اللي بياخدوه اخوانا البعدا و تنام وقت ما تحب وتاكل وقت ماتحب وتاكل اللي انت عايزه من غير ما يتفرض عليك صنف واحد مافيش غيره

هي دي الحرية اللي بنادي بيها ودي حرية مضمونة من غير سحل ولا سجن ولابهدلة وبنادي بيها انا والمجانـ.... قصدي انا واللي زي وخلاص اما بقى الحرية التانية دي لا لا لا مش لينا .

وربنا ينصرنا كمان وكمان ويزود عدد اللي مش عايزين يتجوزو واهي برده حرية واحدة احسن من مافيش وتاخد على قفاك برة بس احسن ماتاخد على قفاك برة وجوة

واشوفكو بعدين بقى

ومتاسف لعدم الكتابة لمدة طويلة لظروف الامتحانات والكسل الفظيع

كلاكيت، عايز تتجوز، عايزة تتجوزي مواصفاتكو ايه ؟

بصو من الآخر أنا هلخص الموضوع في كلمتين أمل بعديه احباط

حلم بعده كابوس خيال بعده واقع محبط يعني

الواحد ولا الواحدة يفضلوا اول عشرين سنة من حياتهم يتعلموا ويكونوا خبرات ويحاولوا يحدد مواصفات شريك حياتهم واول ما يدخلوا في الجد يكتشفوا انه كان صرحا فهوى على راي الست وان كل اللي بيفكروا فيه مش هيلاقوا حتى ربعه

يعني البنت مثلا عايزة فارس وسيم بحصان ابيض

عايزة واحد يكون شبه احمد عز وفي طول خالد ابو النجا وعيون حسين فهمي و دفئ كاظم- بحبك يا كاظم- ونعومة هاني شاكر- عايز ارجع- ورومانسية عبد الحليم ورجولة رشدي اباظة وثقافة نجيب محفوظ امممم لا ماحدش بيبص لكده دلوقتي بلا ثقافة بلا بتاع خلينا في مطرب التنطيط وشقاوته تامر حسني مش عارف 99% من البنات بيحبوه ليه مع انه في اغنيه بيقول لحبيبته انه مش هيرجعلها تاني حتى لو فضلت تتنطط

صحيح اصحاب العقول...

اما التدين فيبقى زي عمرو خالد وطبعا اهم حاجة فلوس احمد عز

وبعدين تيجي بقى الصدمة اول عريس يدخل عليها ايه ده ده قصير

لا ده تخين

لا ده لابس نظارة

لا ده مش بيعرف يقول كلام حلو

لا ده مش بيسمع تامر حسني

لا ده عربيته قديمة

لا ده ابن مامته

لا ده كذا

لاداه كذا

لا

وتفضل تاخد الصدمة ورا الصدمة لحد ما ميفضلش قدامها غير انها تاخد واحد شبه الاستاذ فتح الباب في مسرحية سك على بناتك

قعد بتاع 50 سنة يكون نفسه

أما الولد بقى فلازم شريكة حياته تكون على الفرازة يعني ليها وجه نانسي وجسم مريام فارس وأنوثة هيفا و شخصية منى الشاذلي وعاطفية ودفئ اصالة وشوية من انجلينا جولي وفلوس شاهيناز النجار (زوجة احمد عز برده)ويا عيني اول م يفكر انه يدخل في الجد يلاقي بلاوي تتقلب نانسي لصورتها القديمة

وتتحول رشاقة مريام فارس الى كيس قطن متحرك

اما انوثة هيفا فهي فقط علامة مسجلة باسم هيفا اما بقى المياصة اللي بيقولو عليها انوثة والكلام بالانجليزي والأكل بالشوكة والسكينة واكل النملة يكفيني فخلو بالكو يا شباب ده جر رجل وشوية بشويه الحقيقة المرة تبان ويظهرلك اكل المشنة والبصل والجرجير

وياسلام لو جيت تتكلم في السياسة او تسال بنت عن فيلم اجنبي

مش عارف ليه البنات ما يعرفوش غير روتانا سينما وميلودي افلام

اما بقى لو سالتها عن كتاب ليهكل او لأنيس منصور تقولك دو بيكتبو اغاني لمين دول انا لسة مخلصة كتاب قصة حياة عمرو دياب ياي ده كافح كفاح مرير علشان يقوي عضلات المجنص بتاعه

طيب تعرفي ايه عن فيروز تقولك دي ضاع منها ريال ولسه مش لقياه
يعني بصو الموضوع محبط

علشان تلاقي واحد او واحدة بالمواصفات اللي انت بتتمناها

يبقى تريح نفسك وابعد عن الصدمات بلا جواز بلا نيلة مالها العزوبية

اشوفكو بعدين

عايز تتجوز طيب قولي ازاي؟؟!!!

بص من الاول عايزين نتفق على حاجة انا مش ضد الزواج كمبدأ ولكن مثلي مثل جميع الشباب لما احسبها بالارقام يجيلي احباط واقول بلا جواز بلا نيلة ، وازيد انا عن جميع الشباب في موضوع الحرية ده يعني ما احبش حد يتحكم في تصرفاتي يعني انا مش بقول للناس ماتتجوزوش ولا بشجع قلة الادب بس انا بحب اكون واقعي

يعني مثلا نفرض ان شاب عنده 21 سنه لسه خريج ورور ونقول كده اللهم لا قر ولا حسد انه لقى شغل اه شغل صحيح صعبة شوية بس مش مستحيلة وكمان الشغل ده بمرتب معقول يعني مش 250 جنيه في الشهر زي مصانع مدينة العبيدلا نقول مثلا انه اشتغل بمرتب بتاع 750 جنيه معايا كده

ببالغ صح!!! بس خدوني على قد عقلي هو في حد بيشتغل ب 750 جنيه!!! ده الطبيب خريج الطب بياخد 120 جنيه اول ما يتخرج يبقى تقولي واحد ياخد 750 معلهش استحملوني نقول بقى الاخ اللي بياخد 750 جنيه ده بيحوش منهم 500 في الشهر وهو ياولداه لاوارث ولا عنده بابي يجيله شقه وعربية وعروسه يعني على باب المجيد زيه زي ملايين الشباب ركزوا معايا 500 جنيه في الشهر يعني حارم نفسه من كل حاجة يعني في السنة 6000 جنيه وهو شغال من وهو عنده 21 سنه طيب نكمل يعني بيوفر 6000 جنيه في السنة وهو علشان يفكر في مشروع جواز يعني شبكة ومهر وشقة وجهاز وفرح

يعني نقول شبكة بتاع150 جرام الجرام ماشاء الله بقى رخيص يعني 150 جنيه بس يعني الموضوع كله بتاع 22500 جنيه بس وعلى فكرة 150 جرام دول ولا حاجة كده الشبكة ونقول ان اهل العروسة ناس طيبين يعني مش هايخدو منك مهر كبير يعني بس 5000 جنيه شوف فرحتوا ازاي استنوا ما المأسوف على شبابه العريس هيكتب الباقي مؤخر صداق ده غير القايمة طبعا نيجي بقى للعفش نقول العريس هيجيب اوضة نوم وانتريه وصاله واوضة نوم اطفال نفرض ان سعرهم موحد يعني الاوضة مثلا تروح تجيبها من دمياط ب 5000جنيه
يعني كله بتاع 20000 كمان نيجي بقى للشقة ودي بصراحة مش عارف اقول فيها ايه لان اساسا احتمال انه يلاقي شقة مناسبة لدخله بالظبط زي احتمال وجود العنقاء والخل الوفي فانا مش هتكلم فيها

كده تمام نيجي بقى للفرح مش هنقول بوفيه مفتوح ولحم رومي وحمام وجاتوه مستورد القطعه ب 100 جنيه وتورتة 7 او 8 أدوار يخدو منها حته ويرموا الباقي وعمرو دياب واليسا والكلام ده لا ده مش بتاعنا ده بتاع ولاد الاكابر اما احنا ولاد ال.... لا لاالفرح بتاعنا نقول هنعمله في مركز الشباب ونقول كده الفرقة والرقاصه لالا مفيش رقاصة والمغني العالمي سيد اذية والكهربا والكراسي والشريات والعشا يتكلفولهم بتاع 10000جنيه صح اه نسيت حاجة طبعا في فترة خطوبه او زي ما انا بسميها فترة الاستنزاف حيث تستنزف العروسه واهلها اه واهلها العريس يعني هدية عيد الام والاب وشم النسيم و العيدية في العيد الكبير والصغير و 6 اكتوبر ده بالاضافة لفاتورة التليفون وشحن الموبايل يعني نقول الموضوع كله يخشله في بتاع 3000 جنيه على الاقل حاسين زي بالمهمة المستحيلة حاسس بالاحباط طالع من جوه

طيب نحسب الاجمالي كده 22500+5000+20000+10000+3000 = كده 60500جنيه على فكرة الارقام دي على اقل اقل تقدير وبدون الشقة

يعني صاحبنا هيفضل 10 سنين يحوش في فلوس الجواز

عشر سنين حارم نفسه من كل حاجة علشان يتجوز

عشر سنين كاملين يعني على مايدخل دنيا يكون عنده 31 سنة

كل الناس القديمة قصدي الكبيرة يقولك ان احسن حاجة في الجواز انك تتجوز وانت صغير يعني بالكتير 25 سنه ده السن اللي تقدر فعلا ستمتع فيه بالجواز وتشوف ولادك وهما بيكبرو قدامك وانت صغير برده الناس دي بتحلم فاكرين ان دلوقتي زي زمان

زماااااااااااااااان كان الدنيا لسه بخير كان الحديد رخيص والاسمنت رخيص وكيلو اللحمة ب 10 جنيه الله يخرب بيت الجوز لا التلاته لا لا لا الاربعة اوووووف دول مايتعدوش اللي خربوها وقعدو على تلها وخلو الدنيا غاليه بص من الآخر ما تيأسش الموضوع محتاج صبر واصرار يعني ما تبصش للناس المحبطة اللي زيي وخلي عندك امل بس انا رايي خليك على الموضة حوش تمن الشبكة 22000 وحطهم مقدم عربية وقسط الباقي يعني ممكن تركب عربية في اقل من 3 سنين يعني لو سألتني هقولك بلا جواز بلا بتاع العربية قيمة وسيما وانت في الاخر اللي بتتحكم فيها يمين يمين شمال شمال هات لك عربية واسكت

مشعارف ليه دلوقتي كل حاجة ممكن تيجي بالتقسيط الا العرايس ربنا يسهل و ينزلو عرايس صيني في السوق بالتقسيط

ايه بخرف طيب ما في جثث صيني وعلى الاقل ممكن يعملوا عروسه ما بتقولش لأ وكمان بتقول بابا وماما وتعرف تطبخ وتكنس وتمسح وكمان تاخدها بالضمان

يعني لو لقيتها في يوم بتشتري اكياس سودا وبتسن ساطور تقدر تستبدلها بواحدة جديدة فورا

اشوفكو بعدين

هابي فالنتين

اهو حظي جه كده يببقة اول حاجة اكتبها في اليوم ده 14فبراير علشان كده انا هسيب موضوع الزواج شوية ومش هنعترض على حاجة

النهاردة14 فبراير التاريخ الذي تم اعدام المأسوف على شبابه القديس فالنتين الذي تحدى امبراطور الرومان وبدأ في تزويج الجنود سرابعد ان منع الامبراطور زواج الجنود حتى لا يتشتت تركيزهم ويصبح لهم رابط يمنعهم من التضحية بحياتهم في المعركة (الزوجة والأولاد)

لكن الاخ فالنتين الله يفشفش الطوبة اللي تحت راسه ما عجبهوش الموضوع

وبقى يجوز كل اللي عايز يتجوز في السر

واهو اتقفش واتحكم عليه بالا عدام وآدي اخرة اللي يوفق راسين في الحلال

وعدموه يوم 14 فبراير

ومش عارف مين اللي عمل اليوم ده بقى عيد للحب

المهم وانا راجع من الشغل لقيتلك كل المحلات بقى لونها احمر ورد ايه وقلوب ايه و حاجة كده تحسسك ان الناس مافيش وراهم حاجة غير الحب مع ان العبد الله ماكنش يعرف اصلا ان في عيد للحب الا لما لقيت الدنيا كلها حمرا

وقعدت افكر

ياه كل دي ورود اتزرعت واتقطعت وهتتباع علشان خاطر اللي يكفينا شره الحب

ولا القلوب الحمرا المستورده طبعا من عند اخوانا الصينين تطلع بكام دي

ولا الشيكولاته السويسرية اللي طبعا بالميات والحكومة الغلبانة عمالة محتاسة علشان تاكل الناس عيش حاف والناس الوحشين بيضيعو فلوسهم على الورد والقلوب والشيكولاتة.

طيب انا عايز أعرف حاجة هو لو انا عايز اعبر عن حبي هفضل مستني طول السنة لحد يوم 14 فبراير واجي في اليوم ده بس واجيب وردة حمرا طيب وبقيت السنة!!!

طيب بصيغه تانيةهو الحب محتاج يوم محدد ليه ما نعبرش عن حبنا كل يوم ، ماله 6 اكتوبر ولا 23 يوليو ولا 4 مايو واخدلي بالك انت (عيد ميلاد اللي بالي بالك) واهو فرصة نغني فيها اخترناه اخترناه

انا شايف ان لو عايز تقدم للي انت بتحبه ورده حمرا ممكن تقدمها كل يوم اي وقت مش لازم يوم 14 فبراير

حاجة اخيرة من الآخر ريح نفسك وما تحبش ووفر فلوسك واضمن انك مش هتقع في الفخ اللي اسمه الحب واللي ممكن يجيبلك واحدةتتحكم فيك بقية حياتك ده طبعا لو انتهى بالزواج

كفاية حب ابوك وامك على الاقل لو دخلتلهم بوردة حمرا هتلاقي الشبشب نازل على راسك وامك تقول شوف الاهبل اللي بيضيع فلوسنا على الكلام الفاضي جايبلي ورد مش تجيبلنا 2 كيلو سكر وزجاجة زيت احسن يابن ال.........

ريح دماغك بلا عيد حب بلا كلام فاضي

واشوفكو بعدين